【懶人福音】GU自動收銀機 唔洗2分鐘搞掂走人！

日常生活越嚟越多機會接觸到AI人工智能，尤其喺機械人大國日本，多個零售服務開始引入AI系統，好似深受香港人歡迎嘅服裝品牌GU，日本300間分店喺上年陸續使用自助結賬服務。

月初Aminn到名古屋旅行，發現GU收銀櫃位唔同咗樣，

當抽住一籃子衫想去埋單嘅時候，有個店員就指示我到一部機器面前，睇到畫面張相示意將一籃子衫放入去櫃裏面，其實我都唔知發生咩事，終於店員察覺到我係遊客。。。

店員幫忙喺畫面按到選擇語言嗰版，記得應該係有日文、英文、中文（簡體）。。。

原來日本GU嘅收銀機已經自動化，客人只要打開機底櫃門，將一籃子衫放入去再閂門，機器會自動掃瞄貨品上面barcode位嘅IC標籤，機器就會計算到總金額，過程只需要幾秒鐘！！仲可以選擇畀現金或碌卡，埋單之後自行將一籃子衫拎到後面櫃枱再自行入袋，好似今次買咗3件衫，成個過程只需要2分鐘，既方便又快捷！

自動收銀機佔位少，動作又快，唔駛等店員逐件「嘟」，完全解決到排隊問題。不過仍然會保留幾個傳統櫃台處理需要退稅嘅貨品。至於香港嘅GU有無自助收銀機，就好似無嘅，不過可以「嘟」八達通同信用卡。提提你，香港GU會喺3月31日美麗華商場店會開幕，而皇室堡店就喺4月1日開幕！

 

是次小分享完畢，有興趣可按 麵語錄aminn 或本站內其他分享 :)

Aminn | Beauty．Food．Fun．Travel．Trendy｜ 

www.facebook.com/m.for.aminn / www.instagram.com/starzaminn
任何博客合作請接洽: aminn613@gmail.com

【Min can cook】懶人熱香餅配有機龍舌蘭糖漿

話說Aminn心血來潮想整Pancake，有心整其實唔難，買包熱香餅預拌粉，加蛋加奶拌勻就可以準備煎啦！
我仲要買獨立包裝嘅預拌粉，開一包大約整到6-8塊(視乎厚薄)，後面有埋用料份量，真係簡單到！

材料： - 牛奶 200ml - 蛋 1隻 - 熱香餅粉 200g 先預熱煎pan，快手將粉漿倒到煎pan中央，倒嘅時間太耐會令煎出來嘅顏色唔平均架！ 煎到餅面有好多氣孔(再無出新氣孔)就可以翻另一面，記住每片粉漿份量要差不多。
煎好之後放上碟放涼，煎好晒就疊好，然後放上牛油同淋糖漿~~~

食得！


注重健康嘅朋友，或者想要改變飲食習慣的話，今次Aminn用咗有機龍舌蘭糖漿嚟代替其他過甜嘅糖漿。有機龍舌蘭糖漿唔單止可以用喺甜品，亦可以代替糖加到飲品，或者用嚟烹調，大大減低了白糖對身體嘅傷害。聞說白糖對人類身體會造成78種損害，減低糖份吸收，就係食得健康嘅第一步。

呢支Naturel純天然有機龍舌蘭糖漿，由墨西哥仙人掌類植物藍龍舌蘭花提取。不含任何化學物質或殺蟲劑，無基因改造，屬純素及無麩質食品，而且不含致敏原。

而且比蔗糖甜25%但糖份比砂糖低，用量比砂糖少三份二就可以達到同樣的甜度，加上低升糖指數（GI 27），食用後唔會突然令血糖升高，適合關注血糖、體重及健康人士食用。

Naturel 有機龍舌蘭糖漿

銷售地點：O’FARM、WATSONSMALL、源生坊

是次小分享完畢，有興趣可按 麵語錄aminn 或本站內其他分享 :)

Aminn | Beauty．Food．Fun．Travel．Trendy｜ 

www.facebook.com/m.for.aminn / www.instagram.com/starzaminn
任何博客合作請接洽: aminn613@gmail.com

【懶人福音】Starbucks新服務！唔洗排隊飲咖啡！

如果你係Starbucks嘅常客，應該都有用過佢嘅手機應用程式，可以搜尋分店資料同瀏覽飲品及食品等功能，而且登記做Starbucks會員更加可以直接用手機應用程式嘅儲值付款。

Starbucks Hong Kong最近仲推出新功能「Mobile Order & Pay」，可以透過手機應用程式喺客人指定嘅分店預先落單，因應顯示嘅等候時間到分店就已經準備好晒你嘅Order，慳返排隊時間之外，仲好適合Aminn呢啲選擇困難症患者，拎住電話慢慢諗再落單仲得。呢個新功能已經喺3月11日投入服務，跟住睇吓點樣落單先！

Starbucks手機應用程式本身都有中文同英文語言選擇，「Mobile Order & Pay」操控簡單，除咗有實物圖片，仲有飲品及食品嘅價錢，同實時有無存貨，真係方便到不行！

連平時到Starbucks買咖啡可以跟個人偏好落單，而家連App都有呢個服務！想skimmed milk有skimmed milk，想無糖就無糖，唔駛再嫌自己麻煩～哈！

Aminn仲準備咗影片教學俾大家！

雖然「Mobile Order & Pay」好方便，不過首先要有有面值嘅Starbucks Card，同埋登記咗做會員先用到架！

* 「Mobile Order & Pay」不適用於以下香港/澳門分店：香港浸會大學、香港科技大學、香港大學學生會、香港大學圖書館、東區尤德醫院、聖德肋撒醫院、太古廣場106號、亞洲國際博覽館、澳門永利2及永利皇宮後舖。


是次小分享完畢，有興趣可按 麵語錄aminn 或本站內其他分享 :)

Aminn | Beauty．Food．Fun．Travel．Trendy｜ 

www.facebook.com/m.for.aminn / www.instagram.com/starzaminn
任何博客合作請接洽: aminn613@gmail.com